Feutaga’i e fa’aauau Femalagaiga Faavaomalo, ma le tatala ai o nisi o sā o le Koviti19.

E aofia ai i teuteuga o poloaiga o faalavelave tutupu faafuase’i e ala lea i nisi o vavao ona o le Faama’i o le Koviti le faatulaga mai ai o ni feutagaiga o le a agai iai le malo i le va o Samoa ma Amerika Samoa i le toe faaauauina o femalagaiga a atunu’u e lua.

O se pepa o faamatalaga na tuuina mai i le aso ananafi, ina ua maea ai se faaiuga a le Kapeneta, ua tatala ai nisi o vavao sa faatulai mai e le faigamalo ua tuana’i atu ona o le Koviti19, o loo faaalia ai lea tulaga.

Ua faailoa o ia feutagaiga o le a faatulaga ai faigamalaga i totonu o vaiaso taitasi e faaoga ai vaalele o le Samoa Aiways ma le Talofa Airways.

E le gata i lea ae o le a tilotilo foi i tulaga uma e ao ona faatino mo le puipuiga o le soifua maloloina lautele pe a toe tatala ia malaga.

O le isi itu o le a agai iai talanoaga i le va ma Amerika Samoa o le itu tau pemita mo le malaga i vaa a lalo faapea vaalele.

O sa o le Koviti lea sa iai nei e aofia ai le lē toe mafai lea ona malaga atu se tasi mai Samoa nei i Amerika Samoa faapea foi le motu i Sasa’e vagana ai faamomoli ma uta o mea e manaomia sa mafai lava ona faaee mai faapea foi ona auina atu i vaalele ma malaga a vaa I le sami.

Ua faailoa fo’i o le a feutaga’i le Malo o Samoa e ala i le Matagaluega o le Va i Fafo ma le Malo o Niu Sila ise faigapaaga e mafai ai ona toe tatala faigamalaga i le va o atunuu e lua e faaoga ai aiaiga talafeagai e malilie iai.

O nisi o vavao ua tatala nei e aofia ai le faataga o taelega ma malologa i matafaga faapea vaitaele ae faatoa amata atu i le 12 i le aoauli o Aso Sa.

O le vavao sa iai i lea tulaga sa faapea mai le faigamalo ua tuanai e le gata o puipuiga o le faama’i ae ao ona faamamalu le Aso Sa lea na oo lava fo’i i faatauga i taeao o Aso Sa taitaisi na taofia uma lava.

O se tulaga sa tele ina gugulu ai le toatele ona e le gata o le maua o taumafa fou I taeao o Aso Sa, ae mo faatauoloa o le seleni sa maua mai ai e sili atu i faatauga o le vaiaso atoa.

O lea la ua tatala mai maketi e aofia ai maketi i Savalalo, Fugalei, Salelologa ma Afega e aofia ai le maketi o i’a mo le faatauga o taumafa aua le fofoga taumafa o le atunuu.

O le 4 i le vaveao ua faatulaga mai e tatala ai ia maketi seia toe tapunia i le 9 i le taeao.

O supamaketi, pamu penisini ma faletalavai ua faatulaga mai le tatalaina ai i le Aso Sa mai le 12 i le aoauli seia oo atu i le 10 i le po.

Ua tatala foi sailiga tupe i falekalapu ae tapunia i le 11 i le po.

O le a lē toe popole fo’i le toatele e faimalologa i Savaii i faaiuga o vaiaso ma tau faaofiofi i le tumutumu o Aso Faraile ma Aso Toanai i le Malaga atu ma le toefo’i mai o lea ua tatala le femalagaa’i i le Aso Sa o va’a laupasese, pasi ma taavale i taimi ua faatulagaina.

Ua faataga fo’i faatauoloa i tafā ala ma e faatau savali peitai o loo faamalosia mai le tatau ona 16 tausaga ma luga atu le matutua o faatauoloa.

O ia suiga i poloaiga mo Faalavelave tutupu Faafuase’i o le a faamamaluina amata atu i le aso Gafua 2 o Aokuso,2021 ma o le a faatumauina seia iai se isi suiga.

O isi vavao ona o puipuiga o le faama’i e le’o aofia atu i lenei faasilasilaga na tu’uina mai o loo tumau pea.