28 Fepuari, 2022

Tusia: Maina Vai

Ua maea  folasia faatoesega a lē Ta’ita’i o le HRPP  i le faamasinoga ma isi sui o loo molia i le Faalemigao i le Faamasinoga e ala atu i folasaga tusitusia  a latou loia.

I ia folasaga o loo taua ai e Tuilaepa lona salamō, ma ua iai i lona manatu e toe faafo’i mai ana upu, ma  faatoese atu fo’i.
Sa manatu le Taitai o le HRPP o le faia ai o ia faatoesega o le a avea ma ala e toe faaui ai i tua le  tagi a le Tamaita’i Palemia ma le Vaega faaupufai o le FAST, peitai ua lē o gatasi le futia ma le umele i lona finagalo ma le tagai a le Faamasinoga i le mataupu.

I le silasila a le Faamasinoga ua matuiā ia tu’uaiga, ma ta’uleagaina galuega, ma ua taufaifai ma lē usitaia poloaiga a le Faamasinoga.

O le poloaiga a le faamasinoga ina ia tauaofia le Palemene i le aso 24 o Me 2021, peitai e le’i mafai ona faataunuuina ona ua loka le Maota  o le Palemene tutu ai ma leoleo e faasā ona ulufale se isi i totonu. E oo lava i le savali atu o le Faamasinoga e lei mafai lava ona tatala iai.

O vaega uma ia o le nana o le ki, loka le faitoto’a, na le mafai ai ona faataunuuiina le tauaofiaga a le Palemene, na taua e le loia sa tulai mo le ofisa o le loia sili….ua pei oni mea ula faavalevalea a tamaiti….”Shenanigan Foolishness”
I le silasila a le loia o nei mea uma na fai o ni gaioiga taufaaleaga e taofia ai le tauaofiaga a le Palemene, peitai e lei taunuu uma ia faufauga ona o lea lava sa faatauto le Fofoga o le Fono ma tauaofia le Palemene lona 17 o le Malo Tutoatasi o Samoa.

E faapena fo’i le folasaga a le loia a isi sui e toafa Lauofo Fonotoe Nuafesili Pierre, Lealailepule Rimoni Aiafi, Maiava Visekota Peteru ma Taulealea Sioeli Alofaifo.

Na tu’uina atu foi a latou faatoesega ma ia toe faaui mai i tua a latou tala na fai ma le lagona a faia ia vaega ua muta ai ii lea mataupu.

O faamatalaga taufaifai na faia e i latou ia sa faatino i luga o a latou polokalame i leitiō ma le initaneti.
E toavalu lava i latou sa molia mai i le mataupu lea e aofia ai le sa avea ma Fofoga Fetalai ia Leaupepe Toleafoa Faafisi, o lē sa vaea ma loia sili i le malo talu ai ia Savalenoa Mareva Betham Annandale, Tiatia Graeme Tualaulelei o lē sa avea ma Failautusi o le Palemene ua tuanai, Lauofo Fonotoe Nuafesili Pierre Lauofo, Lealailepule Rimoni Aiafi, Taulealea Sioeli Alofaifo, Maiava Visekota Peteru ma lē sa avea ma Palemia ia Tuilaepa Sailele Malielegaoi.

Sa faapea mai le alii loia o loo tulai mo Tuilaepa o mataupu uma e iai lava lea i itu faamasinoga e filifili ai pe a fai e manatu e toe faaui i tua ma faamuta.

Sa faapea mai le alii Faamasino QC Robert Fisher, e leai sona manatu e faaalia i lea mataupu ona e lei talanoaina, peitai na faaalia le manatu o le alii loia o tulai mai mo le Ofisa o le loia sili ia Robert Lithgow e faapea e tu ese mai lava suesuega ma faagasologa ale Faamsinoga i le mataupu faatatau i le Faalemigao i le Faamasinoga  e fua lava i mea na tutupu ma e ono faaoga ai se civil proceedings peitai tatau ona iloa manino le eseesega o le civil ma le criminal contempt.

O loo ia faailoa fo’i e leai lava ni finauga i le tulaga o le mataupu o le faalemigao e manaomia ai se faatagaga a le Faamasinoga e faamuta ai  pe faaauau mataupu faapea i le faamasinoga, peita’i afai e iai se tulaga e māua e le Faamasinoga e taua ai lenei mataupu i finagalo o tagata lautele e faaono le talia ai le faaui i tua…e ese mai la le mataupu lena.

E faate’ia  le alii loia a le taitai o le itu agai ia David Gilbertson ina ua ia faalogo i le folasaga a Benjamin Keith o le itu a le FAST o loo faagasolo lava le mataupu, ma ia faailoa mai ai sa iai se maliega i le amataga o Fepuari ma le vaega faaupufai o le FAST o taumafaiga lava ia toe faasolomuli i tua le mataupu.

O le mau a le alii Faamasino ia Fisher e faapea sa iai le tulaga faapea na tuuina atu i le faamasnioga peitai e lei faaauauina iai ni galuega a le Faamasinoga.

Na malolo le faamasinoga mo le 15 minute ona ua vaaia le sii o le aao o le Taitai o le HRPP e pei ona fesootai mai ai i le zoom mai Niu Sila, e fia fai mai sona manatu i le mataupu ae o loo faagasolo peitai sa taofia e le alii faamasino ia Fisher ma ia faapea mai e malolo le faamasinoga ae vili e le loia a Tuilepa lana client e fai sa la tala pe o le a le mataupu o loo fia talanoa mai ai… E le mafai e le faamasinoga ona tuuina atu se avanoa ia Tuilaepa ona e tatau ona tutusa uma le faiga ma isi itu…o a latou loia e talanoa atu e ala atu ai o latou finagalo ona tuuina mai lea i le Faamasinoga e loia o loo tulai mo I latou, ae leo latou taitoatasi.

Ua faailoa mai o le a tuuina mai se faaiuga a le Faamasinoga ise taimi i le maea ai o ana galuega.

08 Fepuari,2022
Tusia: Maina Vai

Ua faamaonia mai e le Komesina Lagolago le Afioga ia Leiataualetaua Logoimauga Samuelu Afamasaga le suesuega e faasaga atu i le i lalo ifo ma le 20 leoleo i le Matagaluega o Leoleo, Falepuipui ma le Ola Toefuataina i le taimi nei i lo latou fesootai atu i fualaau faasaina.

Na faailoa e Afamasaga e faapea o le suesuega na faatonuina lea e le Pulega o le Matagaluega o loo iai nei. E afua mai i ni faamatagala ma faamaumauga mai nai masina ua tuana’i atu faapea ai Osofaiga a leoleo sa faatautaia.

“E iai faamatalaga e moni e iai foi faamatalaga e le moni ….ae le mafai ona matou faalogologo ma saga taumatemate lava mea uma….o le taimi la nei la ua fai le suesuega…ae o le tulaga o a’u nei o le Komesina Lagolago o loo tulai le taimi nei ma le Pulega…..Matou te le mananao i ni tagata corrupt ma dishonest ii i le job lea”

“Na pau lava lenei o le Matagaluega e faamalosia le tulafono i totonu o le atunuu lenei….o le suesuega lea ua fai…a talafeagai mau faasaga i mea tau faaofisa e faia moliaga…a lava foi mau faasaga i tulaga tau soligatulafono ua fai loa fo’i moliaga”
Na ia faailoa fo’i o le taimi nei e le’o iai nisi i le tulaga maualuga poo le pulega o le matagaluega o aafia…ae o le tala lea ona o lea faatoa amata le suesuega.

Sa fesiligia foi i le tulaga e ono faamalolo ai i latou mai le galuega, ae na taua e Afamasaga o se taimi o i luma o le a faailoa mai ai ni suiga pe afai lena e lava mau e faasaga i nisi o i latou nei…e mafai ai ona faia lana faaiuga o se Komesina Lagolago o tulai ai ina ia faamalolo le tumau ae seia faaauauina suesuega a le Matagaluega.

Saunoa foi Afamasaga o nei tu’uaiga uma o loo faavae mai i faamatalaga a nisi o i latou ua molia mai ma o ia tagata ua latou soli le tulafono peitai o le taua o a latou mau ma le mamafa o faamatalaga ua tuuina atu e faaono talia ma faalagolago iai le galuega a leoleo ia poo le leai fo’i…..
“Ae so’o se isi lava e fai se faamatagala…. pe o se tagata solitulafono pe leai fo’i e faamauina lava ma vaavaai toto’a iai leoleo….despite the character”

05 Fepuari, 2022

Tusia: Maina Vai

I le alafai mai ai ananafi o le Puleaga Faaakiepikopo Samoa -Apia i le tala faanoanoa i le tuumalo o le Afioga ia Patele Lafaele Muliau Matulino Stowers i Niu Sila. Na vaaia le gasolo i luga o le social media o upu alofa ma faamaisega, o tomanatunatuga a le toatele ua latou lausilafia Patele i soo se tafa o lana galuega faaositaulaga.

Mai lava i lana Matagaluega ma le Vikaliatu, i ona tofiga i isi auaunaga i le Puleaga Faaakiepikopo Samoa – Apia, o ana polokalame o le “Saili Faalumaga i le UPU’… i le Upumana TV i Aso Lua taitasi ma le tele o isi tiute fai o Patele sa galue ai.
O le aso sa maua ai se faatalanoaga ma le Sui Taitai o le Puleaga le Afioga ia Patele Pio Galuemalemana ina ua fesiligia i le soifua auauna o Patele a’o galue ai i Samoa nei.

“O Patele Muliau o se faifeau ua iloga i le Ekalesia lona tulai mai, e talavou ma laitiiti, ae ose faifeau na muamua lava faaea i tofiga maualuluga o le Ekalesia e le Akiepikopo.”

Na soifua mai Patele Muliau i le aso 17 o Ianuari, 1975, ae na faauuina ma Ositaulaga faatasi ma Patele Tietie Fonoti Siatulau i le aso 29 o Me i le tausaga e 2004 e Lana Afioga ia Akiepikopo Alapati Lui Mataeliga.

O ona afioaga o Lano, Vailele ma Fasitoouta, sa aoaoina o ia i le aoga maualalo a Malisi i Lotopa ao lei ulufale atu i le Kolisi o Sagato Iosefo ma agai ai loa e aoaoina i le Seminalio i Fiti (Pacific Regional Seminary). Sa avea o ia ma Sui Taitai Ulu o le kolisi o Sagato Iosefo i le tausaga e 1994.

O lona tausaga i le Seminalio i Fiiti na’o ia lava le Samoa i lea taimi, ma na sili aoao Patele i le Vasa Pasefika atoa i le Seminalio lea i Fiti.

Na faaalia e le Sui Ta’ita’i e tulaga ese lava le galue a Patele i le faatinoga o lona tofiga ma lona Valaauina…” E ese mai lava Patele i faifeau…e iai ana metotia fou…e pito laitiiti ae o tofiga na ia umia e le itiiti ai lana galuega na fai”

E maliu nei Patele o avea o ia ma Sui Epikopo o le Vikaliatu a Sagato Mikaele le Alekagelo Leauvaa ma e atoa i le aso 7 o le Aso Gafua o le vaiaso o lumanai nei le tausaga talu ona avea ma Sui Epikopo o lea Vikaliatu. O ia foi o le faatonu o Tupulaga Talavou mo le Puleaga, sa faiaoga i le Kolisi Faafaifeau i Moamoa atoa ai ma Matagaluega sa ia tausia i le taimi lava e tasi.

“E lauiloa Patele i ana semiar i le Tusi Paia, atoa ma aoaoga a le Ekalesia, e tele matagaluega sa ia tauaveina ona o le tele o ona agava’a”

Na taua foi sa iai le taimi na malaga ai Patele i Trinidad mo aoaoga faalautele atoa ai ma nisi fuafuaga a le Ekalesia.
Na galue fo’i i le Kolisi o Sagato Iosefo i Alafua o lona tiute sa ia vaavaia ai le tulaga tau le amio i totonu o le kolisi ma tauave ai ana mataupu.

“Na toefo’i Patele e galue i le Kolisi sa aoga ai o lana lea tautua e faafetaia ai le Kolisi sa aoaoina ai o ia”

E lauiloa Patele i Tupulaga talavou i lona tulaga o le Faatonu o Tupulaga Talavou a le Puleaga ua loa tausaga o ia umia.
“E anoanoa’i fanau sa nonofo ia Patele o fanau ua faaletonutonu olaga ma ua le mafaia e matua sa nonofo ia Patele…E saua…ae o lona agaga atoa ia gagau amio a tupulaga talavou”

Na taua e le Sui Ta’ita’i o Patele o se faifeau e Tamaoaiga i mafaufauga ma e tele lona sao ile Ekalesia….”Ose faifeau lauga lelei tele, e maati lana lauga i le Tusi Paia ma Aoaoga a le Ekalesia”

“E iu le soifua o Patele, o se faifeau e 24 itula e galue ai e le malolo, ai fo’i o le mea lea ua faatupu gasegase ai….tiga ona ma’i ae le faaitete”

O se molimau a le sa avea ma Sui Taitaifono o le Vikaliatau a Sagato Mikaele i Leauvaa le Afioga Tuala Puletini Tuala na ia taua ai e le’i atoa le tausaga talu ona latou mafuta ma Patele ae ua tele le suiga i lo latou Vikaliatu….
“I le tausaga poo le itiiti foi talu ai ona tauaveina e Patele le foe o le Vikaliatu lenei, ua vaaia ma iai mau e faamauina ai le suiga o le Vikaliatu lenei….It’s pastoral, spiritual,doctrinial awearness has been enlightened and the Leauvaa identity as the forerunner of the Catholic is beginning to be felt”
Na ia faailoa foi e le gata i le Puleaga ua iloga ai lea tulaga ae o le Vikaliatu lava ia o Leauvaa…..”O gauga tao e fasia ai ‘au…e pei o ia upu e faatusa lea i si taimi laitiiti na taunuu mai ai Patele ma galue ma toe alu ese atu… ae a vaai i le suiga tele ua molimauina i lo matou faatuatua”

Na saunoa le Sui Ta’ita’i e leo iloa tonu le taimi nei le gasegase o Patele ua maliu ai ae ose avanoa i le Puleaga e faigata tele ona faatumu pe a tilotilo i le galue a le Ositaulaga sa iai, ma lona sao mo le Ekalesia……
“O Patele e moni ai le upu fo’i lea…’E itiiti a lega mea’ E laitiiti lona soifua ae o mea na ia ausia i lana galue e le itiiti ia.
E leo mautu i le taimi nei le polokalame mo ona toe sauniga ae sa faailoa e le Sui Ta’ita’i o loo faia feutagaiaga ma lona aiga ma faamanino foi o le aso na avea ai ma Ositaulaga o le tama fanau ia a le Puleaga ua tuuina mai e aiga o la latou taulaga tagata mo le Atua e ala i le Puleaga Faaakiepikopo Samoa-Apia.

SIITIA I LE 26 I LATOU UA A’AFIA I LE KOVITI – 19

Ua fa’amaonia le o’o atu i le 26 i latou ua a’afia i le Koviti – 19 i totonu o le atunu’u, i le asō, Aso Lua 25 Ianuari 2022.

O i latou nei o lo’o fa’anofoesea uma i le nofoaga fa’apitoa i le falema’i i Moto’otua mo puipuiga masani, ma le mataituina fa’alesoifua mālōlōina.

E leai se isi o i latou nei o iloa ai auga ma tulaga tuga o le Koviti 19 e pei o le tale, fiva, pepe o tino, faafaufau ma le lagona se fia taumafa.

O le mavae o le 5 o aso i le aso ananafi, (Aso Gafua, 24 Ianuari, 2022) na toe faia ai su’esuega (tests) o le pasese na malaga mai, faatasi ai ma le aufaigaluega uma sa faanofoesea sa muaau i le faataliga o le vaalele e pei ona silafia.

Na faamaonia mai nei suesuega, ua 11 le faaopoopoga o i latou ua a’afia i āuga o le Koviti – 19, o le to’a 6 oi latou nei o le pasese, a’o le to’a 5 e pei ona faailoa atu ananafi, o le aufaigaluega o lo’o muāau mo le puipuiga o le saogālēmū o le atunu’u.

O lo’o faaauau, mapo ma tumau puipuiga masani a le Matāgaluega o le Soifua Mālōlōina ma le Ofisa o Fa’alavelave Tutupu Fa’afuase’i, mo le mata’itūina pea o i latou nei, aemaise fo’i i latou uma o lo’o fa’anofo va’ava’aia i nofoaga fa’apitoa ua fa’atulagaina.

O i latou uma o lo’o fa’anofoesea o le a toe faia o latou su’esuega (tests) i le Aso Tofi nei, 27 Ianuari 2022.

Ua o tatou faaauau pea i le La’asaga 3 (Level 3) (lanu mūmū) mo Poloa’iga o Fa’alavelave Tutupu Fa’afuase’i e pei ona tapunia ai le atunu’u atoa, mo le puipuiga lautele o Samoa mai lenei fa’ama’i.

O le fa’amanatu, ia tautuanā fa’aaogā tali fofoga i taimi uma ma usitā’ia fautuaga o lo’o tu’uina atu mo le saogālēmū o tagata uma.

23,Ianuari,2022

Tusia: Maina Vai

To’aono na taofia ma molia e leoleo ina ua maua o feoa’i i taavale e faasuaava i taimi ua iai le atunuu i sa o le tapunia ai e pei ona amata i le afiafi ananafi. E le gata i lea ae o le isi foi e toatasi ua faasala ai ona o le le usitaia lava o sa o le Tapunia ai o Samoa (lockdown).
O le tali mai lea o le Komesina Lagolago le Afioga ia Auapaau Logoitino Filipo ina ua fesiligia e tusa ai o se tulaga sa iai la latou galuega mai le taimi na amata ai le lockdown seia oo mai i le afiafi lenei o le Aso Sa, o lea ua atoa le 24 itula talu ona iai le atunuu i le lockdown.
Na faaalia e Auapaau e toaitiiti lava na maua e leoleo o le usitaia sa o le tapunia ai o le atunuu, ae sa vaaia lava le aga’i o tagata e fa’amamalu e tusa ai o le fa’asilasilaga na tu’uina mai e le Tamaita’i Palemia o Samoa i le aso ananafi.
Na taua foi e Auapaau e toatasi se failotu ua lapataia nei e leoleo ona na maua o lo’o faia lava lana sauniga lotu analeila. Sa fesiligia e leoleo lea failotu ma sa ia fa’apea mai o ia na tu’u e fai lotu i le TV ae ua le taunu’u lea la ua fa’auau ai pea lana sauniga i lo latou ekalesia.
Na faaalia e Auapaa…”E leai se tulaga fa’apena e faia, afai ua tu’uina atu le fa’aaliga e tatau ona usitaia e tagata uma, o lo’o ua maea iai foi tulafono e limataitaiina ai le galuega a leoleo e tusa ai o ia itu uma.”
Sa ia fa’apea mai foi o le ala lea e toe talosaga mai ai i lo tatou atunu’u ina ia tatou galulue fa’atasi.
O le a fa’aauau taeao le asiasiga a le malo i le motu o Upolu e mataitu le tulaga o lo’o iai le tapunia ai o Samoa ona o tulaga i le faama’i.
Na saunoa mai fo’i Auapaau o lo’o fa’atino lava la latou galuega i tulaga o lo’o latou maua atu o soli ai le tulafono, ae tulaga e le’o maua e leoleo, seivagana ua fa’ao’o atu e le atunu’u ona galulue lea o le matagaluega e faatino le fesoasoani.

06 Oketopa,2021

Ua faamaonia mai e le Komesina Lagolago ia Auapaau Logoitino Filipo le molia ai e leoleo o ni alii se toalua i le moliaga o le faia o ni uiga taufaasese ua mafua ai le gau o nisi o le mamalu o le atunuu sa fia malaga i galuega faavaitaimi.
O le aso 18 o le masina nei o le a tutulai ai i laua nei i luma o le faamasinoga e tali atu i o la moliaga.
O le taimi nei o loo i lalo o le vaavaiga a leoleo i laua ia e toalua.
O le mataupu lenei na mafua mai i le lua vaiaso talu ai i le malaevaalele faavaomalo i Faleolo, ina ua oo atu i latou ua aafia i le malaevaalele mo le faigamalaga i Niu Sila ma faateia ai e leai se faigamalaga o fuafuaina i lea po.
O lea lava po na agai sa’o mai ai lava le toa 20 o i latou na aafia, faatasi ai ma o latou aiga na agai atu e faamavae i le faigamalaga i le Ofisa o Leoleo i Apia ma faila ai loa a latou tagi e faasaga i le aualii ia e toalua.
Sa faatino le sailiga a leoleo ma faamautu ai tulaga uma i suesuega lea ua mafua ai moliaga o i laua o loo masalomia i lea mataupu.
O loo masalomia o i laua ua molia sa la maua ni tupe mai ia i latou ua aafia na totogi atu mo le faia o a latou tusifolau, ma talosaga o visa. E le aofia ai i ia seleni nisi foi tupe sa totogi atu e i latou ua aafia mo lipoti a le fomai ma leoleo.
O se tulaga na faailoa ai le popolega i nisi o faalapotopotoga o loo gafa ma le taumafaiga e malu puipuia tagata faialuega faapea i atunuu i fafo e pei o le Samoa First Union.
Na taua e le ofisa sinia o lea faalapotopotoga le Tamaitai ia Saina Tomi e faapea ua avea le naunau e maua le avanoa i le lisi o i latou e malaga i galuega nei ma ala ua faigofie ai ona pau atu i faiga nei taufaasese.
O galuega nei faavaitaimi o loo tapuvae tasi le faagasologa o fuafuaga, e ala i pepa malaga ma aoaoga, uma mo le malaga atu o tatou tagata e galulue i atunuu i fafo i galuega faavaitaimi i lalo o le pulega a le Matagaluega o Pisinisi, Alamanuia ma Leipa.

6 Oketopa 2021

Ua faamaonia e le Fa’amasinoga Maualuga moliaga e lua o le alii o Koneferenisi Faitoa Moli o Falefa, ua talia ai nei le tolaulauina o lona faasalaga i le aso 4 o Novema, 2021.

O le moliaga muamua o lona togiina lea o le na aafia i le fagu (Throwing an Object), ma le moliaga lona lua o le fa’ao’o o manuaga tuga i le na aafia (Causing Grevious Bodily Harm).

O le faalavelave lenei na tulai mai i le afioaga o Falefa i le masina o Ianuari o le tausaga nei, o le ua molia sa faia se taumafaga ava malosi ma le ua aafia, ma vevesi ai loa, togi ai e le ua molia le mata o le na aafia i le fagu.

E masina atoa na taoto ai le ua aafia i le falema’i ma ua aveese lona mata agavale (tulou) ona ua tele lona aafiaga.
O i latou na molimau i lenei mataupu e aofia ai ma le fomai sa ia togafitia le na aafia.

O nei moliaga ua faamaonia e aunoa ma se masalosaloga e pei ona saunoa le Tamaita’i Faamasino ia Tafaoimalo Leilani Tuala Warren.

E tusa ai o molimau sa tolaulauina i le taimi o le iloiloga a le Faamasinoga faapea ai ma le faamatalaga lava a le ua molia i lea mataupu e faavae mai ai le faaiuga a le Faamasinoga i le moliaga o le togiina o le na aafia i le fagu pia.

O le moliaga o le faao’o manuaga tuga sa faailoa e Tafaoimalo o se moliaga ogaoga tele ma o le fesiligia ai pe faamaonia e tuga tele le manua, sa faailoa mai lea i le ripoti a le Fomai na tulai, na ia faailoa ai o le mata agavale na sali ese(tulou).

“In relation to wheather the injury was grevious bodily harm, according to the Doctor’s report and her evidence, the left eye has been removed, so this is very serious harm and it goes under the definition of grevious bodily harm”
Sa ia faailoa foi sa fesiligia fo’i pe sa fuafua lelei le faia o lenei faaooga manu’a, ma e afua mai le fuafua lelei ini itu e lua…o upu e lafo atoa ai ma gaioiga ona e le mafai ona vaai atu i le mafaufau o le tagata atoa ai ma mea uma o loo ia mafaufauina.
E tusa ai o le faamatalaga faamauina muamua a le na molia sa ia faailoa ai na ia lafo upu masoa i le na aafia ona ia togiina lea o le na aafia i le fagu pe a ma le 2 mita lo la va.
Faailoa e Tafaoimalo “O le togiina o se tagata i le fagu o loo iai iina le tulaga o le fuafua i le manatu atoa e faao’o se manua i lena tagata”
O le moliaga lenei o le faao’o manuaga tuga e le i lalo ifo o le 10 tausaga e nofosala ai i le falepuipui se tasi pe a faamaonia lana solitulafono.

Ua faailoa manino mai e le Tamaita’i Minisitā o Tupe a le atunu’u le tulaga faigatā ua feagai nei ma le Faigāmalo fou e tau toe totogi aitalafu a le Malo ua tuana’i.

Na faaali manino e Mulipola Anarosa Molio’o e tupu nei tulaga ae ua ausia e Samoa le tapulaa e gata ai ana aitalafu lea e tusa ma le 50%.

O le tapula’a o lo’o fa’aogaina nei e fua a’i le aofaiga o aitalafu a Samoa e tatau ona le silia lea ma le 50% o le tamaoaiga o le atunuu. O le tausaga ua mavae sa i le 40% o le tamaoaiga o le atunuu le tapula’a sa faaogaina. Saunoa Mulipola…

“Ua taofi a tatou aitalafu ona ua ausia le 50% e le tatau la I le faigamalō fou ona toe tuu atu ona ua tatou ise tulaga māaleale”

E tusa ma le $1.0 piliona le aofaiga o aitalafu a Samoa o loo iai nei, ma ua faailoa o le a galue loa le faigamalo fou ini polokalame e faamautū ai faiga faavae o aitalafu ina ia mafai ona tu’uitiitia ma gafatia le faatupeina o nisi o atinae ma ia mautinoa e iai pea se tupe e tua iai le faatupe ina o tala o tupe mo taimi o faalavelave Faafuase’i faapea faalavelave faalēnaturae ono aafia ai Samoa.

Sa fa’amanino e Mulipola ina ua fesiligia e tusitala i le maea ai o le fono a le Palemene i le asō e faapea o le $1piliona lea e aisilia ai lava aitalafu a Samoa i le faletupe o Saina.

” Tasi piliona le tatou aitalafu ua iai I le taimi nei ma o le telē o le pasene o lenā aitalafu o le faletupe lea i Saina, ma o loo iai le faamoemoe o le faigamalo e iai auala e tu’uitiitia ai”

O nisi o nei auala o loo tilotilo iai le faigamalo fou o tupe maua a matagaluega ina ia tilotilo i ni vaega tupe a matagaluega e leo ausia le maualuga ma ia mautinoa e galulue le aufaigaluega e atinae ia faateleina ai tupe maua.

14 Setema,2021

O se tala fiafia lea ina ua tolaulau le tala faatatau o le tupe mo le tausaga fa’aletupe lenei 2021-2022. Saunoa le Tamaita’i Minisita o Tupe le Afioga ia Mulipola Anarosa Molio’o o le vaaiga lautele lava i le tala o le tupe lenei ia fa’atamaoaigaina aiga i nuu i tua,ia tutusa lelei ma tagata i Apia o lo’o fai a latou pisinisi ma maua mea.

O le folasaga a le tamaita’i minisita ua faailoa ai le 20% ua pau ai auaunaga a le Malo mo le atunuu e aofia ai i ia auaunaga le resitalaina o ta’avale e iai pasi ma ta’avale laiti lau pasese, o laisene o Pisinisi, o le totogi o suega a fanau, totogi o Fa’amasinoga tau Fanua ma Suafa, pau tau o totogi tau soifua maloloina, pau tau o tusi folau, o pemita fausia ai fale, faapea ma pasese mo femalagaiga i va’a la’upasese, ma isi lava auaunaga a le malo mo tagatanuu o Samoa.

Ua tuuina atu fo’i i le tala o le tupe lenei le tupe faavae e $11 miliona o se vaega o le alagatupe e $51 miliona, lea sa polomisi atu ai le Vaega Fa’aupufai o le FAST i le atunu’u e fa’aagaga mo atinae i itumalo.
Saunoa Mulipola o lea ua tu’uina mai i le tala o le tupe lenei le $11 miliona o se tupe faavae aua le tapenaga o faiga faavae e amata ai atinae o itumalo taitaisi e 51.

O le taimi nei o lea e laisene taifaalua i le tausaga taavale la’upasese e aofia ai pasi ma taavale laiti, ma o lea auaunaga o loo ua gafa nei ma le Matagaluega o Leoleo ina ua se’e ese mai i le LTA sa iai i tausaga ua mavae.
E $12 a le tagata matua e totogi mo le pasese i le va’a o loo iai i le taimi nei, tusa ma le $24 e totogi i le alu ma le toefo’i mai, ae $6 a le tamaitiiti tusa lea ma le $12 le alu ma le toefo’i mai, o le totogi o taavale e malaga i le va’a e amata atu i le $80 le alu $80 le toefo’i mai, agai i le selau ma ona tupu o lo’o iai i le taimi nei.

O le Faamasinoga o Fanua ma Suafa na siitia mai i le tausaga na mavae nei nisi o tau o Faamasinoga e aofia ai le $500 e totogi pe afai e tuai ona faaulu le tala tusia o se faamasinoga mai le aso faatulagaina.
Afai fo’i e fia ta’atia se talosaga i se mataupu i le faamasinoga ma le agaga e saili se tali i tua, ae mafai ona toefoi mai pe a le maua se tasi i se mataupu e $500 e totogi e faataatia ai le talosaga.

E le gata i lea o le talosaga faaulu atu lea e $100 e totogi i le Faamasinoga o Fanua ma Suafa, aemaise le resitala o matai lea e $100 i le suafa e tasi, faaopoopo le $20 pe a tuai ona resitala.

O suega a fanau le isi mataupu sa feagai foi ma le ofisa o aoga, to’atuga ona o le tuua ai o totogi ona ua le gafatia e nisi matua ona totogi atu i le taimi faatapula’a, atonu o le a foia lea faafitauli i le faamamaavega ua iai nei. O se tasi lea o anavatau a le Faigamalo lenei a’o agai ai le Vaega Faaupufai o le FAST e feiloai ma Itumalo i taimi a’o le’i faia le faiga palota tele a le atunu’u.

Sa faailoa fo’i e le Tamaita’i Palemia Afioga ia Fiame Naomi Mataafa i nisi o ana fonotaga ma tusitala, le agaga o le faigamalo ina ia atamamai a tatou fanau, ma o itu ia o loo ave iai le faamuamua a le malo fou o aoaoga ma le soifua maloloina.

O le tala o le tupe o loo faaalia ai le maualuga o le seleni faamatu’u atu, tusa lea ma le $109.9 miliona mo le Matagaluega o Aoga Taaloga ma Aganu’u.

O le a fa’aauauina pea lauga a sui faipule o le Maota agai i le tala o le tupe ua folasia i le Palemene o Samoa i le vaiaso nei o lo’o feagai ai le Palemene ma ana galuega.