Talia e le Ao o le Malo le Usuia o le Palemene ile Vaiaso Fou

O le feiloaiga a le ta’ita’i o le vaega fa’aupufai a le Fa’atuatua i le Atua Samoa ua Tasi (FAST) le Afioga i le Sa’o Fa’apito Fiame Naomi Mataafa, le Sui Ta’ita’i La’aulialemalietoa Leuatea Polataivao ma le Afioga i le Ao Mamalu o le Malo, I le Tuia’ana Tuimalealiifano Va’aletoa Sualavi II i le aso, ua mautu mai ai lona finagalo o le a talo le usuina o le Palemene i le aso Gafua 24 Me 2021.
Na fa’aalia e Fiame le talia lelei e le Afioga i le Ao Mamalu o le Malo o la latou talosaga e fa’ataunu’u loa le tatalaina o le Palemene.
Na ta’ua e Fiame o le tatalo i lana Afioga ina ia fa’ataunu’uina lea faamoemoe i le aso Faraile 21 Me 2021 ona o le aso Gafua e amata ai fa’amasinoga o faiga palota.
Na fa’aalia le agaga fiafa o le Ta’ita’i ona o le maualuga o le silasila a Lana Afioga ia i latou na tusi aao iai le atunuu i le faiga palota tele i le aso 9 Aperila 2021.
E tusa ai ma le Fa’avae o le Malo Tutoatasi o Samoa, e tatau ona valaauina le Palamene i le 45 aso mai le aso na fa’atino ai le faiga palota, ma o ia aso e mae’a i le aso Gafua o le vaiaso fou.
E ui i se tala fiafia ua tu’uina mai e le Afioga ia Fiame, ae o lo’o fa’apena lava ona fa’agasolo i luma o le Fa’amasinoga mataupu apili a le Malo Tausimea (Caretaker Government) fa’asaga i fa’aiuga e lua na tu’uina mai i le Aso Gafua o le vaiaso nei, e fa’amaonia ai le moni ma le sa’o o mau na laga e le FAST.
“E tupu ma ola se sosaiete pe a toto e tama ma tina matutua laau, ma le mautinoa, e leai so latou avanoa e nofonofo ai i lalo o paolo o ia laau” (A society grows when old men and women plant trees whose shade they know they will never sit in….)