7 Iulai,2021
Maina Vai.
Ua faaalia manino mai e le alii loia ia Alex Su’a, le tulaga lē malupuipuia o iai nei molimau o lo’o faatulaga mo mataupu i le Faamasinoga.
Saunoa Su’a o se tasi lenei o tulaga ua mafua ai ona tolopoina le mataupu i le va o le sui ta’ita’i o le HRPP ia Fonotoe Pierre Lauofo ma le sui tamaita’i ia To’omata Norah Leota Siaki.
O loo tagi le Toomata ma tu’uaia Fonotoe lea sa manumalo mai i le palota mo le Itumalo o Anoama’a 2 i tu’uaiga e 10 e 7 tu’uaiga o le tu’uina atu o tupe i tagata palota e fa’atosina ai ina ia palota mai(bribery) ae tolu tu’uaiga o le faia o ni faiga fa’asolitulafono (treating).
Ua maea faaulu atu foi le tagi a Fonotoe fa’asaga atu ia To’omata i tu’uaiga e 8 o le bribery.
A’o faagasolo ai lea mataupu i le taeao analeila, na fa’aalia e Alex Su’a sa iai le isi a latou molimau na toso ese mai e se tagata ae o lo’o fa’atali i fafo mai o le potu faamasino.
“O molimau ia ua maea faatautoina…o le faanoanoaga ona o lea ua faalavelaveina tulaga o le amiotonu”- Alex Su’a
Na ia faailoa foi o loo faalavelaveina lea tulaga e fono a nuu, ma e le itiiti faiga e faamata’u ai molimau ma le taumafaiga ina ia faasese ma tatai ese mai molimau mai le faailoa atu o mea na tutupu i le faamasinoga.
Ua faailoa e le alii loia o analeila na iloa ai ia faiga i le mataupu lenei a Anoama’a 2, ma o molimau a lo latou itu lea na aafia ai.
O Alex Su’a o loo tulai mo le sui tamaita’i ia Toomata ma sa ia faailoa foi e le nao le fale faamasino foi o loo iloa ai ia faiga na ia taua e leo aofia ai faiga o tu ma aga a nuu o loo faia i tua.
O se itu na fesiligia ai fo’i le tiute o Malu o le Malo o loo iai i aso uma i le Fale Faamasino. Sa feso’otai atu le Nofoilo Samoa i le tamaita’i Sui Komesina o Leoleo ia Papalii Monalisa Tiai Keti i le tulaga tonu o le galuega a leoleo….ona sa maua foi le talosaga atu o alii loia i lenei mataupu i malu o le Malo sa iai analeila.
Ina ia mafai ona aveese mai (escort) molimau a lea itu faamasinoga e aunoa ma le oo atu iai o nisi o loo faia ia tulaga…peitai sa tali mai leoleo…..e le’o so latou lea faafitauli.
Ua faailoa mai e Papalii e tuu atu se taimi sei feso’otai mai ai i le tiute sa galulue i le Faamasinoga analeila.
E tusa ai o lenei faafitauli ua faailoa ai e le alii loia ia Alex Su’a e faapea…” Ua i le Faamasinoga le malosiaga atoatoa e tusa ai ma le tulafono na te suesueina ai faiga piopio o lo’o faatino”
Afai ae faamaonia ia tuuaiga e ono molia se tasi i le moliaga o le faalavelaveina o le tulaga o le amiotonu ( conspiring to defeat justice) ma e le silia i le 3 tausaga I le falepuipui lona faasalaga.
O taeao lea o le a toe valaau ai le mataupu a Anoamaa 2 I le Faamasinoga.
Nofoilo Samoa 