Fa’afaigofie i vaitau faigatā.

• 

O le asō ua faaipoipo atu ai Elijah Shawnte Fasavalu ia Linda Schuhhardt i le Faamasinoga
a Samoa.

O Elijah ose alii e alala i Motootua e iai ona aiga i Falelatai o le tamaitai o Linda o ona matua e mai le atunuu o Siamani ae na soifua ae i Samoa nei.

O Elijah o se alii leoleo ae o Linda o se e pule i le 1962 Cafe i Motootua, sa fetaui i laua i le Cocktails on the Rocks.

Na faailoa e le alii faaipoipo o ia e mai le fanau e toavalu, ua maliu lona tamā, ua tele ina fai aiga o ona tuafafine ma uso ae na’o i laua ma lona tinā le aiga.

Na ia taua ua la filifilia le auala lea e faaipoipo ai e faigofie mo i laua

Na ma talanoa ai lava ma mafaufau atu i tupe faaalu ma mea uma lava, aemaise fo’i o lenei vaitau ua tatou iai i le faama’i o le Koviti.

Sa tonu ai loa i o ma manatu ia faia iinei i le Faamasinoga la ma faaipoipoga.

Na ia fa’ailoa fo’i e le mananao e fai ni aitalafu ae ia faasao se tupe ua la maua, aua so la fale ma se fanua pe faatau foi se taavale e amata ai lo la aiga, ae le gata i lea o le fesoasoani atu i o la aiga.

O Elijah 22 tausaga le matua na maliu lona tamā i le 2012 na te lei faailoa atu lava lo latou aiga i Falelatai ae o ia sa ola a’e i Motootua.

O le tamaita’i o Linda 22 tausaga, na ola a’e foi i Samoa nei e le’o fia faailoa mai le tulaga na oo mai ai lona aiga i Samoa, ae na ia taua o lona tinā na sau i Samoa pe a ma le silia i le 20 tausaga talu ai.

O lona tamā o lo’o i Siamani ae na’o i latou ma lona tina le aiga.

E silia i le tasi le tausaga talu ona feiloa’i i laua nei ma tonu ai loa e faatasia i le Faaipoipoga.

Manuia le aiga fou.